தமிழக வெற்றிக் கழகம் (தவெக) தொடர்ந்து குதிரை பேரத்தில் ஈடுபட்டு வருவதாகக் குற்றம்சாட்டி, அம்மா மக்கள் முன்னேற்றக் கழக (அமமுக) பொதுச்செயலாளர் டிடிவி தினகரன் தமிழ்நாடு ஆளுநர் ராஜேந்திர விஸ்வநாத் அர்லேகரைச் சந்தித்துப் புகார் அளித்துள்ளார்.
ஆளுநர் மாளிகையில் சந்திப்பு
சென்னை கிண்டியில் உள்ள ஆளுநர் மாளிகையில் ஆளுநரைச் சந்தித்த டிடிவி தினகரன், அமமுக சார்பில் வெற்றி பெற்ற சட்டமன்ற உறுப்பினரைக் குதிரை பேரம் மூலம் தங்கள் பக்கம் இழுக்கத் தவெக முயற்சித்த விவகாரம் குறித்து விரிவாகப் பேசினார்.
“நடவடிக்கை எடுக்காமல் தாமதம்” – டிடிவி தினகரன் சாடல் ஆளுநருடனான சந்திப்பிற்குப் பிறகு செய்தியாளர்களிடம் பேசிய டிடிவி தினகரன், தவெகவின் செயல்பாடுகளைக் கடுமையாக விமர்சித்தார். “தங்களை நேர்மையான அரசியல் கட்சி எனக் கூறிக்கொள்ளும் தவெக, சட்டமன்ற உறுப்பினர்களைத் தம் பக்கம் இழுக்கக் குதிரை பேரத்தில் ஈடுபட்டது.
இதுகுறித்து ஆளுநரிடம் ஆரம்பத்திலேயே புகார் மனு அளித்து 100 நாட்கள் கடந்துவிட்ட நிலையிலும், இதுவரை அதன் மீது எந்தவிதமான சட்டப்பூர்வ நடவடிக்கையும் எடுக்கப்படவில்லை என்று தனது ஆதங்கத்தை வெளிப்படுத்தினார்.
அரசியல் களத்தில் பரபரப்புநடந்து முடிந்த தேர்தலில் அமமுக சார்பில் தேர்ந்தெடுக்கப்பட்ட எம்.எல்.ஏ காமராஜ், நம்பிக்கை வாக்களிப்பின் போது தவெக அரசுக்கு ஆதரவாக வாக்களித்த சம்பவத்தைக் குறிப்பிட்ட அவர், இந்த ஜனநாயக விரோத நடவடிக்கைகளுக்குப் பின்னணியில் உள்ளவர்கள் மீது உரிய விசாரணை நடத்தப்பட்டு நடவடிக்கை எடுக்கப்பட வேண்டும் என மீண்டும் வலியுறுத்தியுள்ளார்.
100 நாட்களைக் கடந்தும் குதிரை பேரப் புகார் விவகாரத்தில் அமமுக பொதுச்செயலாளர் ஆளுநரை நேரில் சந்தித்து அழுத்தம் கொடுத்துள்ளது தமிழக அரசியல் வட்டாரத்தில் மீண்டும் பெரும் பரபரப்பைக் கிளப்பியுள்ளது.