“திட்டத்தைக் கைவிடாவிட்டால் சட்ட, அரசியல் போராட்டம் வெடிக்கும்” என பாமக எச்சரிக்கை! ரெஸ்டோ பார்களுக்கு அனுமதி அளிக்கும் தவெக அரசின் முடிவை எதிர்த்து பாமக தலைவர் அன்புமணி ராமதாஸ் அறிக்கை வெளியிட்டுள்ளார். HL3A உரிமம் வழங்கும் திட்டம் கைவிடப்படாவிட்டால், கடுமையான சட்ட மற்றும் அரசியல் போராட்டங்களை பாமக நடத்தும் என்று அவர் குறிப்பிட்டுள்ளார்.
தமிழ்நாட்டில் உணவகங்களுடன் இணைந்த ‘ரெஸ்டோ பார்களை’ (Resto-Bars) அமைப்பதற்கும், அதற்காகப் புதிய ‘HL3A’ உரிமங்களை வழங்குவதற்கும் தமிழக வெற்றி கழக (தவெக) அரசு பரிசீலனை செய்து வருவதற்குப் பாட்டாளி மக்கள் கட்சியின் தலைவர் டாக்டர் அன்புமணி ராமதாஸ் கடும் கண்டனம் தெரிவித்துள்ளார். இத்தகைய திட்டங்கள் சமூகக் கேட்டை விளைவிக்கும் என்றும், புதிய குடிகாரர்களை உருவாக்கும் என்றும் எச்சரித்துள்ள அவர், இம்முடிவை அரசு உடனடியாகக் கைவிட வேண்டும் என வலியுறுத்தியுள்ளார்.
இதுதொடர்பாக பாமக தலைவர் அன்புமணி ராமதாஸ் இன்று வெளியிட்டுள்ள விரிவான அறிக்கை பின்வருமாறு,
பிற்போக்குத்தனமான முடிவு
“தமிழ்நாட்டில் மது அரக்கனால் லட்சக்கணக்கான குடும்பங்கள் சீரழிந்து வரும் நிலையில், உணவகங்களிலேயே மது பரிமாற அனுமதிக்கும் வகையில் ‘ரெஸ்டோ பார்’ அமைக்கும் திட்டத்தை அரசு பரிசீலிப்பது அதிர்ச்சியளிக்கிறது. இது முற்றிலும் பிற்போக்குத்தனமான செயலாகும். உணவகங்களுக்குக் குடும்பம் குடும்பமாக மக்கள் வந்து செல்லும் சூழலில், அங்கு மதுபானக் கூடங்களை அமைப்பது பொது அமைதியையும் கலாச்சாரத்தையும் சீர்குலைக்கும். இந்த ‘HL3A’ என்ற புதிய உரிம நடைமுறையானது, தமிழ்நாட்டின் மூலை முடுக்கெல்லாம் மது கலாச்சாரத்தைக் கொண்டு சேர்க்கும் ஆபத்தான முயற்சியாகும்.
புதிய குடிகாரர்கள் உருவாகும் அபாயம்
ஏற்கனவே டாஸ்மாக் கடைகளால் இளைஞர்களும், மாணவர்களும் சீரழிந்து வரும் நிலையில், உயர்தர மற்றும் நடுத்தர உணவகங்களில் ரெஸ்டோ பார்களை அனுமதிப்பது புதிய குடிகாரர்களை மட்டுமே உருவாக்கும். பொழுதுபோக்கு என்ற பெயரில் மதுவை இன்னும் எளிதாகக் கிடைக்கச் செய்வது, வளர்ச்சியை நோக்கிச் செல்லும் ஒரு மாநிலத்திற்கு அழகல்ல. மாற்றத்தை நோக்கிய ஆட்சி என்று கூறிக்கொண்டு, மது வணிகத்தைப் பெருக்க அரசு முற்படுவது ஏமாற்றமளிக்கிறது.
பாமகவின் அடுத்தகட்டப் போராட்டம்
மதுவிலக்கை நோக்கித் தமிழ்நாடு நகர வேண்டும் என்பதே ஒட்டுமொத்த பொதுமக்களின் கோரிக்கையாக உள்ளது. எனவே, சமூகக் கேட்டை விளைவிக்கும் இந்த ரெஸ்டோ பார் உரிமம் வழங்கும் திட்டத்தை அரசு உடனடியாகக் கைவிட வேண்டும். பொதுமக்களின் நலனையும், பெண்களின் பாதுகாப்பையும் கருத்தில் கொண்டு அரசு நல்ல முடிவை எடுக்கத் தவறினால், பாட்டாளி மக்கள் கட்சி சும்மா இருக்காது. இந்தத் திட்டத்திற்கு எதிராகப் பாமக சார்பில் நீதிமன்றங்களை நாடி சட்டப் போராட்டமும், மக்களைத் திரட்டிப் பிரம்மாண்டமான அரசியல் போராட்டங்களும் முன்னெடுக்கப்படும்” என்று அன்புமணி ராமதாஸ் தனது அறிக்கையில் திட்டவட்டமாக எச்சரித்துள்ளார்.