தமிழகத்தில் தேர்தல் நடத்தை விதிகள் அமலில் உள்ள நிலையில், பூந்தமல்லி அடுத்த செம்பரம்பாக்கத்தில் உரிய ஆவணங்களின்றி கொண்டு செல்லப்பட்ட ரூ. 27.5 லட்சம் ரொக்கப் பணத்தை தேர்தல் பறக்கும் படையினர் அதிரடியாகப் பறிமுதல் செய்துள்ளனர்.
தமிழக சட்டமன்றத் தேர்தல் நெருங்குவதையொட்டி, வாக்காளர்களுக்குப் பணம் மற்றும் பரிசுப் பொருட்கள் விநியோகிப்பதைத் தடுக்க மாநிலம் முழுவதும் தேர்தல் பறக்கும் படையினர் தீவிர கண்காணிப்பில் ஈடுபட்டு வருகின்றனர்.
இந்நிலையில், இன்று காலை பூந்தமல்லி அருகே உள்ள செம்பரம்பாக்கம் பகுதியில் தேர்தல் துணை வட்டாட்சியர் தலைமையிலான பறக்கும் படையினர் மற்றும் போலீசார் தீவிர வாகன சோதனையில் ஈடுபட்டிருந்தனர். அப்போது அந்த வழியாக அதிவேகமாக வந்த இருசக்கர வாகனம் ஒன்றை நிறுத்திச் சோதனையிட்டனர்.
துணியில் சுற்றப்பட்ட கட்டுக்கட்டான பணம்
அந்த பைக்கில் வந்த நபரின் நடவடிக்கையில் சந்தேகமடைந்த அதிகாரிகள், அவர் வைத்திருந்த பையைச் சோதித்தனர். அதில் பழைய துணிகளுக்கு நடுவே மறைத்து வைக்கப்பட்டிருந்த ரூ. 27.5 லட்சம் மதிப்பிலான கட்டுக்கட்டான நோட்டுகளைக் கண்டு அதிகாரிகள் அதிர்ச்சியடைந்தனர். அந்தப் பணத்தைக் கொண்டு செல்வதற்கான எந்தவிதமான முறையான ஆவணங்களும் அவரிடம் இல்லை என்பது உறுதி செய்யப்பட்டது.
இதனையடுத்து, பணத்தையும் கடத்தலுக்குப் பயன்படுத்தப்பட்ட இருசக்கர வாகனத்தையும் போலீசார் பறிமுதல் செய்தனர். விசாரணையில், பிடிபட்ட நபர் மாரிமுத்து என்பது தெரியவந்துள்ளது.
இந்தப் பணம் எங்கிருந்து கொண்டு வரப்பட்டது?
யாருக்குக் கொடுப்பதற்காக எடுத்துச் செல்லப்பட்டது?
இதன் பின்னணியில் ஏதேனும் அரசியல் பிரமுகர்கள் உள்ளனரா? என்ற கோணத்தில் போலீசார் மற்றும் தேர்தல் அதிகாரிகள் மாரிமுத்துவிடம் தீவிர விசாரணை மேற்கொண்டு வருகின்றனர். பறிமுதல் செய்யப்பட்ட பணம் கருவூலத்தில் ஒப்படைக்கப்படும் எனத் தெரிவிக்கப்பட்டுள்ளது.
செம்பரம்பாக்கம் பகுதியில் பட்டப்பகலில் துணியில் சுற்றிப் பணம் கடத்தப்பட்ட சம்பவம் அப்பகுதியில் பெரும் பரபரப்பை ஏற்படுத்தியுள்ளது.
ஸ்டுடியோ உரிமையாளரிடம் ரூ.4 லட்சம் பறிமுதல்….தேர்தல் பறக்கும் படை அதிரடி