“அதிமுகவில் இருந்து பலர் பதவி சுகத்திற்காகவும், தங்களது பணத்தைக் காப்பாற்றிக் கொள்வதற்காகவும் மட்டுமே மாற்று கட்சிக்குச் சென்றுள்ளனர்” என அதிமுக பொதுச் செயலாளர் எடப்பாடி பழனிசாமி காரசாரமாக பேசியுள்ளார். சென்னை ராயப்பேட்டை அவ்வை சண்முகம் சாலையில் உள்ள அதிமுக தலைமை அலுவலகமான எம்.ஜி.ஆர் மாளிகையில், பொதுச் செயலாளர் எடப்பாடி பழனிசாமி தலைமையில் ஆலோசனைக் கூட்டம் நடைபெற்றது.
நடந்து முடிந்த சட்டமன்றப் பொதுத் தேர்தல் முடிவுகள், கட்சியின் மறுசீரமைப்பு மற்றும் ஆக்கப்பூர்வமான வளர்ச்சிப் பணிகள் குறித்து, தஞ்சாவூர் மாவட்ட நிர்வாகிகளுடன் இந்த ஆலோசனைக் கூட்டம் மேற்கொள்ளப்பட்டது. இந்தக் கூட்டத்தில், தேர்தல் தோல்விக்கான காரணங்கள் மற்றும் கட்சியை அடுத்தகட்டத்திற்கு எடுத்துச் செல்வது குறித்து விரிவாக விவாதிக்கப்பட்டது.
கவர்ச்சி மாயையை நம்பி மக்கள் ஏமாந்துவிட்டனர்
ஆலோசனைக் கூட்டத்தில் நிர்வாகிகள் மத்தியில் அதிமுக பொதுச் செயலாளர் எடப்பாடி பழனிசாமி பேசியதாவது:
”அனைத்திந்திய அண்ணா திராவிட முன்னேற்றக் கழகம் என்பது எத்தனையோ வெற்றி, தோல்விகளைச் சந்தித்த ஒரு பேரியக்கம். இந்தத் தேர்தலில் மற்றவர்களின் வெற்றிக்கான காரணம் என்ன என்பதை நாம் பெரிதாக ஆராயத் தேவையில்லை. ஏனென்றால், அது வெளிப்படையாகவே தெரிகிறது; அது ஒரு கவர்ச்சிகரமான மாயை. அந்தக் கவர்ச்சியை நம்பி மக்கள் வாக்களித்து ஏமாந்து விட்டார்கள். தற்போது தேர்தல் முடிந்து இந்த ஒரு மாத காலத்திற்குள்ளேயே மக்கள் அதனை உணர்ந்தும் விட்டார்கள்.”
பீனிக்ஸ் பறவையாக அதிமுக மீண்டெழும்
மேலும் பேசிய அவர், அரசியலில் வெற்றி, தோல்வி என்பது மிகவும் சகஜமான ஒன்று எனக் குறிப்பிட்டார். “அதிமுகவை நிர்மூலமாக்க சிலர் முயற்சிக்கின்றனர், ஆனால் அது எப்போதும் நடக்காது. சரிவுகளில் இருந்து மீண்டு வரும் பீனிக்ஸ் பறவை போல, அதிமுக மீண்டும் வெகுண்டு எழுந்து நிச்சயம் ஆட்சி கட்டிலில் அமரும்” என்று தொண்டர்களுக்கு நம்பிக்கை ஊட்டினார்.
துரோகிகள் வெளியேறியுள்ளனர்
கட்சியை விட்டு மாறுபவர்கள் குறித்துப் பேசிய எடப்பாடி பழனிசாமி, “இங்கிருந்து பலர் மாற்று கட்சிக்குச் சென்றுள்ளனர். அவர்கள் யாரும் இந்த இயக்கத்திற்கு உண்மையான விசுவாசிகள் அல்ல. வெறும் பதவி சுகத்திற்காகவும், தங்களது பணத்தைக் காப்பாற்றிக் கொள்வதற்காகவுமே அவர்கள் மாற்று கட்சிக்குச் சென்றுள்ளனர்” எனச் சாடினார்.
புதிய புத்துணர்வு
இறுதியாக, கட்சியின் எதிர்காலத்தைக் கருத்தில் கொண்டு, இளைஞர் அணி பாசறை மற்றும் இளம் பெண்கள் பாசறை ஆகிய அணிகளுக்கு மீண்டும் புத்துணர்வு அளித்து, தங்களது களப்பணிகளை தீவிரமாகச் செயல்படுத்த வேண்டும் என்று நிர்வாகிகளுக்கு அவர் அறிவுறுத்தினார்.