காமெடி நடிகர் கிங்ஸ்லி, சீரியல் நடிகை சங்கீதாவை காதல் திருமணம் செய்தார்!

பிரபல நகைச்சுவை நடிகர் ரெடின் கிங்ஸ்லிக்கும், சீரியல் நடிகை சங்கீதாவுக்கும் திருமணம் நடைபெற்று முடிந்தது. 

தமிழ் திரையுலகில் வளர்ந்து வரும் நகைச்சுவை நடிகர்களில் முக்கியமானவர் ரெடின் கிங்ஸ்லி. வித்தியாசமான உடல் மொழியில் சிரிக்க வைக்கும் அவரது காமெடிக்கு தனி ரசிகர் பட்டாளமே உள்ளது. 90களில் சில படங்களில் துணை நடிகராக நடித்துள்ளார். பின்னர் சென்னை மற்றும் பெங்களூருவில் வேலை பார்த்து வந்தார். இதையடுத்து நெல்சன் திலீப்குமார் இயக்கிய கோலமாவு கோகிலா திரைப்படம் ரெடினுக்கு ரீ என்ட்ரியாக அமைந்தது. தொடர்ந்து நெல்சன் இயக்கிய அனைத்து படங்களிலும் அவர் நடித்தார். டாக்டர், பீஸ்ட், ஜெயிலர் என அனைத்து படங்களிலும் அவர் நகைச்சுவை வேடத்தில் நடித்திருக்கிறார். இதில் டாக்டர் படத்தில் காவல் துறை நண்பனாக ரெடின் நடித்தது பலரின் கவனத்தை ஈர்த்தது.

இதுமட்டுமன்றி எல்கேஜி, அண்ணாத்த, காத்து வாக்குல ரெண்டு காதல், ஏஜெண்ட் கண்ணாயிதம், காரி, கட்டா குஸ்தி உள்ளிட்ட படங்களிலும் அவர் நடித்துள்ளார். இந்நிலையில், கோலிவுட்டில் காமெடியனாக கலக்கி வரும் ரெடின் கிங்ஸ்லி இன்று சீரியல் நடிகை சங்கீதாவை திருமணம் செய்து கொண்டார். இவரின் திருமண புகைப்படங்கள் தற்போது இணையத்தில் வைரலாகி வருகின்றன. இவருக்கு பல்வேறு திரை பிரபலங்கள் மற்றும் ரசிகர்கள் தங்கள் வாழ்த்துகளை தெரிவித்து வருகின்றனர்.