இயக்குநர் கார்த்திக் சுப்பராஜ் இயக்கத்தில் வெளியாகியுள்ள ‘டோரதி’ திரைப்படம் திரையுலகினர் மற்றும் ரசிகர்கள் மத்தியில் கவனம் பெற்று வருகிறது. ரிஷிகாந்த், சனந்த், கீர்த்தி சுரேஷ் உள்ளிட்டோர் முக்கிய கதாபாத்திரங்களில் நடித்துள்ள இந்தப் படம், பாலின அடையாளம், சாதி வன்முறை மற்றும் சமூகத்தின் அணுகுமுறை உள்ளிட்ட விஷயங்களை மையமாகக் கொண்டு உருவாகியுள்ளது.
சின்மயி பாராட்டு
‘டோரதி’ திரைப்படத்தை பார்த்த பாடகி சின்மயி ஸ்ரீபாதா, தனது சமூக வலைதளப் பக்கத்தில் படத்தின் போஸ்டரை பகிர்ந்து பாராட்டியுள்ளார்.
“Beautiful, Divine, God’s work. Dorothy is stunning. So beautiful” என அவர் படத்தைப் பாராட்டி பதிவிட்டுள்ளார்.
விமர்சகரின் கருத்து
சின்மயியின் பாராட்டு பதிவுக்கு கீழ் ஒருவர் படத்தின் LGBTQ+ சமூகத்தை பிரதிபலிக்கும் விதம் குறித்து விமர்சனமாகவும், சின்மயியின் தனிப்பட்ட வாழ்க்கையை கேள்விக்குள்ளாக்கும் வகையிலும் கருத்து பதிவிட்டதாக தகவல் வெளியாகியுள்ளது.
இதற்கு சின்மயி பதிலளித்துள்ளார். இதுபோன்ற கருத்துகள் தமிழ்நாட்டை முற்போக்கான மாநிலமாக தான் கருதாததற்கான காரணத்தை விளக்குவதாக அவர் குறிப்பிட்டுள்ளார். மேலும், பாலியல் குற்றச்சாட்டுகள் தொடர்பான விவகாரங்களில் குற்றம் சாட்டப்பட்டவர்களுக்கு ஆதரவாக இருப்பவர்கள் இதுபோன்று நடந்து கொள்வதில் ஆச்சரியமில்லை என்றும் அவர் தெரிவித்துள்ளார்.
திருநங்கை சமூகத்தை குறிவைக்கும் விமர்சனங்கள்
‘டோரதி’ திரைப்படத்தில் திருநங்கை கதாபாத்திரம் இடம்பெற்றுள்ள நிலையில், அந்தக் கதாபாத்திரம் தொடர்பாக சமூக வலைதளங்களில் சில விமர்சனங்களும் எழுந்துள்ளன.
இதற்கு முன்பும் ஒரு பயனர், படத்தை விமர்சிக்கும் வகையில் ரயிலில் ஒருவர் மற்றொருவரை பாலியல் ரீதியாக தொந்தரவு செய்யும் காட்சியை பகிர்ந்திருந்தார். அதனை வைத்து ஒரு குறிப்பிட்ட சமூகத்தையே குற்றம் சாட்டும் வகையில் கருத்து தெரிவிக்கப்பட்டதாகவும், அதற்கு சின்மயி பதிலளித்ததாகவும் தகவல்கள் வெளியாகியுள்ளன.
‘டோரதி’ குறித்து கார்த்திக் சுப்பராஜின் கருத்து
‘டோரதி’ திரைப்படத்தை சுற்றி சமூக வலைதளங்களில் எதிர்மறையான விமர்சனங்கள் எழுந்த நிலையில், இயக்குநர் கார்த்திக் சுப்பராஜும் இதுகுறித்து முன்பு கருத்து தெரிவித்திருந்தார்.
படத்தை விமர்சிப்பவர்கள் முதலில் திரைப்படத்தை பார்த்துவிட்டு கருத்து தெரிவிக்க வேண்டும் என்றும், இந்தப் படத்தின் மூலம் ஒரு புதிய விவாதம் தொடங்கியிருப்பதை நேர்மறையான விஷயமாக பார்ப்பதாகவும் அவர் கூறியிருந்தார்.
இந்நிலையில், ‘டோரதி’ படத்தை சின்மயி பாராட்டியதும், அதற்கு எதிராக வந்த விமர்சனத்திற்கு அவர் பதிலடி கொடுத்ததும் சமூக வலைதளங்களில் கவனம் பெற்றுள்ளது.