நாடு முழுவதும் மருத்துவ சேர்க்கைக்கான ‘நீட்’ (NEET) தேர்வில் தொடரும் முறைகேடுகள் மற்றும் ஆள்மாறாட்டங்களைக் கண்டித்தும், நீட் தேர்வை முற்றிலும் ரத்து செய்யக் கோரியும் பல்லாயிரக்கணக்கான இளைஞர்கள் டெல்லியை முற்றுகையிட்டுப் போராட்டத்தில் ஈடுபட்டு வருகின்றனர்.
பாராளுமன்ற முற்றுகை – முடங்கிய டெல்லி
வேலை தேடும் பட்டதாரி இளைஞர்கள் மற்றும் மாணவர்களின் கோபக் கனலாக உருவெடுத்துள்ள இந்தப் போராட்டத்தால் தலைநகர் டெல்லி ஸ்தம்பித்துள்ளது. போராட்டக்காரர்களைக் கட்டுப்படுத்த துணை ராணுவப் படையினர் களமிறக்கப்பட்டுள்ளனர். முன்னெச்சரிக்கை நடவடிக்கையாகப் பல மெட்ரோ ரயில் நிலையங்கள் மூடப்பட்டுள்ளதுடன், இணையச் சேவைகளும் துண்டிக்கப்பட்டுள்ளன. அதிகார வர்க்கத்தின் அடக்குமுறைகளையும் லத்திச் சார்ஜ்களையும் பொருட்படுத்தாமல் இளைஞர் கூட்டம் திரண்டு வருவதால், பாராளுமன்றத்தைச் சுற்றியுள்ள பகுதிகள் கடும் பாதுகாப்பு வளையத்திற்குள் கொண்டு வரப்பட்டுள்ளன.
போராட்டக்காரர்களின் முக்கியக் கோரிக்கைகள்
வினாத்தாள் கசிவு, தேர்வு மையக் குளறுபடிகள், ஆள்மாறாட்டம் மற்றும் பயிற்சி மையங்களின் வணிகச் சுரண்டல்களுக்கு முற்றுப்புள்ளி வைக்கும் வகையில் ‘நீட்’ தேர்வை உடனடியாக ரத்து செய்ய வேண்டும். கல்வி அமைப்பில் நிலவும் முறைகேடுகளுக்குப் பொறுப்பேற்று, ஒன்றிய கல்வி அமைச்சர் தர்மேந்திர பிரதான் உடனடியாகப் பதவியிலிருந்து விலக வேண்டும். நீட் தேர்வின் பாதிப்பால் இதுவரை உயிரை மாய்த்துக்கொண்ட மாணவர்களின் குடும்பங்களுக்குத் தகுந்த இழப்பீடு வழங்க வேண்டும்.
’தமிழகத்தில் தொடங்கிய தீ’
”மாணவி அனிதாவின் மரணத்தில் தொடங்கி, நீட் தேர்வுக்கு எதிராக முதன்முதலில் குரல் கொடுத்துச் சட்டப் போராட்டங்களையும், மக்கள் மன்றப் போராட்டங்களையும் முன்னெடுத்தது தமிழ்நாடுதான். தமிழகத்தில் பற்றவைக்கப்பட்ட அந்த எதிர்ப்புக் குரல், இன்றைக்குத் தேசம் முழுவதும் இளைஞர்களின் பெரும் போராட்டமாக மாறியுள்ளது” என்று அரசியல் கவனிப்பாளர்கள் சுட்டிக்காட்டுகின்றனர். அதிகார வர்க்கத்தின் மௌனத்தைக் கலைத்து, தங்களின் எதிர்காலத்தைப் பாதுகாக்கத் திரண்டுள்ள இந்த இளைஞர் திரளின் போராட்டம், தற்போது தேசிய அளவில் பெரும் அரசியல் அதிர்வலைகளை ஏற்படுத்தியுள்ளது.