தமிழக சட்டசபையில் பலத்தை நிரூபிக்க தமிழக வெற்றிக் கழக (தவெக) அரசு குதிரை பேரத்தில் ஈடுபடுவதாக எதிர்க்கட்சியான திமுக சுமத்தியுள்ள குற்றச்சாட்டு, மாநில அரசியலில் பெரும் புயலைக் கிளப்பியுள்ளது. ஆளுநர் விளக்கம் கேட்டு அனுப்பிய கடிதங்களுக்கு அரசு தரப்பில் பதில் அளிக்கப்படாத நிலையில், திமுக மீண்டும் ஆளுநரைச் சந்தித்து ஆதாரங்களைச் சமர்ப்பித்துள்ளது.
அரசு தரப்பின் மௌனம் – ஆளுநர் கடிதம்
தவெக அரசு ஆட்சியைக் தக்கவைத்துக்கொள்ள எம்.எல்.ஏ-க்கள் பேரத்தில் ஈடுபடுவதாக திமுக சார்பில் ஆளுநர் ராஜேந்திர விஸ்வநாத் அர்லேக்கரிடம் ஏற்கனவே புகார் அளிக்கப்பட்டிருந்தது. புகாரின் தீவிரத்தைக் கருத்தில் கொண்டு, இது குறித்து விளக்கம் அளிக்குமாறு தமிழக தலைமைச் செயலாளர் சாய்குமார் மற்றும் சபாநாயகர் ஜே.சி.டி. பிரபாகரன் ஆகியோருக்கு ஆளுநர் மாளிகையிலிருந்து அதிகாரப்பூர்வ கடிதங்கள் அனுப்பப்பட்டன. எனினும், அரசு தரப்பிலிருந்தோ அல்லது சபாநாயகர் அலுவலகத்திலிருந்தோ இதுவரை எந்த விளக்கமும் ஆளுநருக்கு அனுப்பப்படவில்லை என்று கூறப்படுகிறது.
2-வது முறையாக ஆளுநரைச் சந்தித்த திமுக
அரசு தரப்பின் மௌனத்தைத் தொடர்ந்து, திமுகவின் முக்கியப் பிரதிநிதிகள் குழு மீண்டும் ஆளுநர் அர்லேக்கரை நேரில் சந்தித்தது. அப்போது, தவெக அரசின் குதிரை பேரத்திற்கான கூடுதல் ஆதாரங்களை வழங்கி, முதல் புகாரின் மீது எடுக்கப்பட்ட நடவடிக்கைகள் குறித்துக் கேட்டறிந்தனர். அதற்குப் பதிலளித்த ஆளுநர், “நான் அரசிடம் விளக்கம் கேட்டு அனுப்பிய கடிதங்களுக்கு இதுவரை எந்தவொரு பதிலும் வரவில்லை” என்று தற்போதைய நிலவரத்தை அவர்களிடம் தெரிவித்துள்ளார்.
”பதில் தராவிட்டால் ஒப்புக்கொண்டதாக அர்த்தம்”
ஆளுநரின் விளக்கத்தைக் கேட்ட திமுகவினர், “புகார் அளித்தும் அரசு பதில் அளிக்காமல் மௌனம் காப்பது, அவர்கள் குதிரை பேரத்தில் ஈடுபட்டதை அவர்களே ஒப்புக்கொண்டதாகவே கருதப்படும்” என வாதிட்டனர். மேலும், மீண்டும் புகார் அளித்தும் தவெக அரசு மீது உரிய நடவடிக்கை எடுக்கப்படாவிட்டால், இந்த விவகாரத்தைச் சட்டப்படி எதிர்கொள்ள நீதிமன்றத்தை நாடப்போவதாக திமுக தலைவர்கள் திட்டவட்டமாகத் தெரிவித்துள்ளனர்.
ஆளுநரின் அடுத்தகட்ட அதிரடி திட்டம்
திமுகவின் இரண்டாவது புகாரைத் தொடர்ந்து, தவெக அரசுக்கு ஆளுநர் மீண்டும் ஒரு விளக்கக் கடிதம் அனுப்பியுள்ளார். இருப்பினும் பதில் வராததால் அவர் கடும் அதிருப்தியில் இருப்பதாக ஆளுநர் மாளிகை வட்டாரங்கள் தெரிவிக்கின்றன. இன்னும் ஒரு வார காலத்திற்குள் அரசு தரப்பிலிருந்து முறையான பதில் வரவில்லை எனில், அரசின் முக்கியப் பொறுப்பாளர்களை நேரடியாக ஆளுநர் மாளிகைக்கு அழைத்துக் கண்டிப்பது உள்ளிட்ட அடுத்தகட்ட நடவடிக்கைகளில் இறங்க ஆளுநர் திட்டமிட்டுள்ளதாகத் தெரிகிறது. இந்த விவகாரத்தில் தவெக அரசு அளிக்கப்போகும் பதிலும், ஆளுநர் எடுக்கவுள்ள நடவடிக்கைகளுமே தமிழக அரசியலின் அடுத்தகட்ட நகர்வைத் தீர்மானிக்கும் என எதிர்பார்க்கப்படுகிறது.