“ராமதாஸுக்கு வேறு வேலையில்லை. அதனால், தினமும் ஏதாவது ஒரு அறிக்கை வெளியிட்டுக் கொண்டிருப்பார். அதற்கெல்லாம் பதில் சொல்ல வேண்டிய அவசியமே இல்லை” என்று முதல்வர் ஸ்டாலின் அவர்கள் பேசியது மூத்த அரசியல்வாதியான ராமதாஸ் அவர்களை சிறுமைப்படுத்தும் விதமாக கருதுகிறோம். இதற்காக முதல்வர் வருத்தம் தெரிவிக்க வேண்டும்’’ என பாமவினர் போராட்டம் நடத்தி வருகின்றனர்.
இந்நிலையில், விரைவில் விழுப்புரத்தில் முன்னாள் அமைச்சர் ஏ.கோவிந்தசாமியின் நினைவரங்கத்தையும் இட ஒதுக்கீடு போராட்டத்தின் போது துப்பாக்கிச்சூட்டில் உயிர்நீத்த 21 சமூக நீதி போராளிகள் நினைவாக கட்டப்பட்டுள்ள மணிமண்டபத்தையும் முதல்வர் ஸ்டாலின் திறந்துவைக்க இருக்கிறார்.
இதை வைத்தே வட மாவட்டங்களில் இப்போது அரசியல் சர்ச்சை வெடித்துள்ளது. 2019-ல் விக்கிரவாண்டி இடைத் தேர்தல் பிரச்சாரத்துக்காக வந்த திமுக தலைவர் ஸ்டாலின், திண்டிவனம் – விழுப்புரம் சாலையில் உள்ள இட ஒதுக்கீடு போராட்டத்தில் உயிரிழந்தவர்களின் நினைவுத்தூண்களுக்கு மலர்வளையம் வைத்து அஞ்சலி செலுத்தப்போவதாக தகவல் வெளியானது. ஆனால், ஸ்டாலின் அங்கு வரக்கூடாது என பாமகவினர் மல்லுக்கு நின்றதால் ஸ்டாலின் அந்த முயற்சியைக் கைவிட்டார்.
இதுகுறித்து பாமகவினர், “தேர்தல் பிரச்சாரத்தில்கூட, இட ஒதுக்கீட்டு போராளிகளுக்கு மணிமண்டபம் கட்டுவது குறித்து எவ்வித வாக்குறுதியும் ஸ்டாலின் அளிக்கவில்லை. ஆனால் ஆட்சிக்கு வந்ததும், இட ஒதுக்கீடு போராட்ட தியாகிகள் நினைவிடத்துக்கு தன்னை வரவிடாமல் செய்துவிட்டார்களே என்ற ஆதங்கத்தில், முன்னாள் அமைச்சர் ஏ.கோவிந்தசாமிக்கு நினைவு அரங்கம் கட்டுவதற்கும், இட ஒதுக்கீட்டுப் போராட்ட தியாகிகள் நினைவு மணிமண்டபம் கட்டுவதற்குமான முயற்சிகளை முன்னெடுத்தார் ஸ்டாலின்.
ஆனால் இதையெல்லாம் செய்பவர், வன்னியர் உள் இடஒதுக்கீட்டு விஷயத்தில் விரைந்து செயல்பட்டு அதை அமல்படுத்துவதற்கான முயற்சிகளை எடுக்காதது ஏன்?” என்று கேள்வி எழுப்பினர்.
இதனிடையே, மணிமண்டப திறப்பு விழாவின் போது, வன்னியர்களுக்கான உள் இடஒதுக்கீட்டை முதல்வர் அறிவிக்க வேண்டும் எனச் சொல்லி இருக்கிறார் மருத்துவர் ராமதாஸ். இந்த விழாவில் கலந்துகொள்ள ராமதாஸுக்கும் அழைப்பிதழ் அனுப்பப்படும் என தெரிவித்திருக்கிறார் அமைச்சர் பொன்முடி.
இதற்கு நடுவே, “ராமதாஸூக்கு வேறு வேலை இல்லை. அதனால் தினமும் அறிக்கை விட்டுக்கொண்டுள்ளார்” என முதல்வர் காட்டமாக கருத்துச் சொன்னதும் வன்னியர் வட்டாரத்தில் கொந்தளிப்பை உண்டாக்கி இருக்கிறது. ‘மருத்துவர் ராமதாஸுக்கு மக்கள் நலன் குறித்து சிந்திப்பதும், அவர்களுக்காக குரல் கொடுப்பதும், அரசின் குறைகளை சுட்டிக்காட்டுவதும் தான் வேலை’ என பதில் கொடுத்திருக்கிறார் அன்புமணி துபாயில் இருக்கும் மருத்துவர் ராமதாஸ் 28-ம் தேதி தான் தமிழகம் திரும்புகிறார். இந்நிலையில், விழுப்புரம் விழாவில் வன்னியர் இட ஒதுக்கீட்ட அறிவிக்க வேண்டும் என பாமகவினர் ஒன்றியம் வாரியாக தீர்மானம் நிறைவேற்றி ஆட்சியரிடம் மனு அளிக்க முடிவெடுத்துள்ளனர்.
இத்தகைய சூழலில், விழாவில் பாமக பங்கெடுக்குமா என பாமக சமூக நீதிப் பேரவையின் தலைவர் வழக்கறிஞர் பாலுவிடம் கேட்டதற்கு, “வன்னியர்களுக்கு தனி இட ஒதுக்கீடு அளிப்பது குறித்து மாநில அரசு முடிவெடுக்கலாம் என உச்ச நீதிமன்றம் சொன்ன பிறகும் இட ஒதுக்கீடு வழங்குவது தொடர்பாக தமிழக அரசு சிறு முயற்சியும் மேற்கொள்ளவில்லை.
இப்படியான சூழலில் மணிமண்டபம் திறப்பதாக கூறி சமூகநீதி தொடர்பான எங்களின் கோரிக்கையை நீர்த்துப் போகச் செய்யும் முயற்சியாக இது மாறிவிடக் கூடாது. இந்த விஷயத்தில் வன்னியர்கள் இப்போது விழிப்பாக உள்ளனர். இட ஒதுக்கீடு தொடர்பான மருத்துவர் ராமதாஸின் கடிதத்திற்கு அரசின் பதிலைப் பொறுத்தே பாமக இந்த விழாவில் பங்கேற்பது குறித்து முடிவெடுக்கும்” என்றார்.
பாமகவின் நிலைப்பாடு குறித்து திமுக ஆதரவாளர்கள், ‘‘இவர்கள் கலந்து கொள்ளவில்லை என்றால், மணி மண்டபம் திறக்காதா? மரியாதைக்காக அழைப்பு அனுப்படுகிறது. அதை புறக்கணித்தால் இழப்பு பா.ம.க-வுக்குத்தான்’’ என்கின்றனர்.