சிவகங்கையில் ரூ.20 கோடி மதிப்பிலான வளர்ச்சிப் பணிகளுக்கான ஒப்பந்தங்களை வழங்க கமிஷன் கேட்பதாகக் குற்றச்சாட்டு – தவெக நிர்வாகிகளுக்கு மட்டுமே ஒப்பந்தங்களை வழங்க முயற்சிப்பதாகவும் புகார் – முதல்வர் ஜோசப் விஜய் விரிவான விசாரணைக்கு உத்தரவிட்டு நடவடிக்கை எடுக்க வேண்டும் என டிடிவி தினகரன் வலியுறுத்தல்!
சிவகங்கை மாவட்டத்தில் அரசு வளர்ச்சிப் பணிகளுக்கான ஒப்பந்தங்களை ஒதுக்குவதற்கு 20 சதவீதம் வரை கமிஷன் கேட்பதாக தவெக சட்டமன்ற உறுப்பினர் குழந்தை ராணி மீது புகார் எழுந்துள்ளதாக அம்மா மக்கள் முன்னேற்றக் கழகப் பொதுச்செயலாளர் டிடிவி தினகரன் குற்றம்சாட்டியுள்ளார்.
ஊழலை ஒழிக்கவும், நேர்மையான நிர்வாகத்தை வழங்கவும் வந்ததாகக் கூறிக்கொள்ளும் தவெக ஆட்சியில், ஒப்பந்தப் பணிகளை ஒதுக்குவதற்காக ‘வெற்றி கமிஷன் திட்டம்’ தொடங்கப்பட்டுள்ளதா? எனவும் அவர் கேள்வி எழுப்பியுள்ளார்.
இதுதொடர்பாக அவர் வெளியிட்டுள்ள அறிக்கையில் கூறியிருப்பதாவது:
ரூ.20 கோடி வளர்ச்சிப் பணிகளுக்கு 20 சதவீதம் கமிஷன் கேட்பதாகப் புகார்!
சிவகங்கை மாவட்டத்தில் VB-G RAM G திட்டத்தின் (125 நாள் வேலைவாய்ப்புத் திட்டம்) கீழ் சுமார் ரூ.20 கோடி மதிப்பிலான வளர்ச்சிப் பணிகள் ஒதுக்கப்பட்டுள்ளன.
இந்தப் பணிகளுக்கான ஒப்பந்தங்களை விதிமுறைகளை மீறி தவெக கட்சி நிர்வாகிகளுக்கு மட்டுமே வழங்க முயற்சிப்பதாகவும், ஒப்பந்தங்களைப் பெறுவதற்காக ஊராட்சி ஒன்றியத்தில் பதிவு செய்துள்ள ஒப்பந்ததாரர்களிடம் 20 சதவீதம் வரை கமிஷன் கேட்பதாகவும் சிவகங்கை தவெக சட்டமன்ற உறுப்பினர் குழந்தை ராணி மீது புகார் எழுந்துள்ளது.
ஊழலை ஒழிக்க வந்ததாகக் கூறிக்கொள்ளும் தூய சக்தி, தற்போது 20 சதவீத கமிஷன் பெறுவதற்காக ‘வெற்றி கமிஷன் திட்டத்தை’ தொடங்கியுள்ளதா? என்ற கேள்வியும் எழுகிறது.
தவெக நிர்வாகிகள் மீது அதிகார துஷ்பிரயோகப் புகார்கள்!
சிவகங்கை மாவட்டம் மட்டுமல்லாது, தமிழகம் முழுவதும் தவெக சட்டமன்ற உறுப்பினர்கள் முதல் சாதாரணக் கட்சி நிர்வாகிகள் வரை கட்டப்பஞ்சாயத்தில் ஈடுபடுவது, கமிஷன் கேட்பது, அரசு அதிகாரிகளை மிரட்டுவது எனப் பல்வேறு அதிகார துஷ்பிரயோகங்களில் ஈடுபட்டு வருவதாக ஒப்பந்ததாரர்கள் குற்றம்சாட்டி வருகின்றனர்.
இதனால் மக்கள் நலத் திட்டங்களை முறையாகச் செயல்படுத்த முடியாத சூழல் உருவாகியுள்ளதோடு, பல்வேறு தொழில் நிறுவனங்களின் செயல்பாடுகளும் பாதிக்கப்பட்டுள்ளதாகப் புகார்கள் எழுந்துள்ளன.
லஞ்சம் கொடுக்க வேண்டாம் என அறிவுறுத்திய முதல்வருக்கு கேள்வி!
“உங்களிடம் யாராவது லஞ்சம் கேட்டால், இது உங்கள் விஜய் ஆட்சி என்று சொல்லி லஞ்சம் கொடுக்காதீர்கள்” என மக்களுக்கு அறிவுரை வழங்கிய முதலமைச்சர் ஜோசப் விஜய், தனது அமைச்சர்கள் மற்றும் சட்டமன்ற உறுப்பினர்கள் மீது எழும் ஊழல் மற்றும் முறைகேடு குற்றச்சாட்டுகளை முறையாக விசாரித்து உரிய நடவடிக்கை எடுக்காமல் அலட்சியமாகச் செயல்படுவதாக டிடிவி தினகரன் விமர்சித்துள்ளார்.
இதன் விளைவாகவே இன்று ஒரு சட்டமன்ற உறுப்பினரே 20 சதவீதம் வரை கமிஷன் என்ற பெயரில் ‘சர்வீஸ் சார்ஜ்’ கேட்கும் அளவிற்கு நிலைமை மோசமடைந்துள்ளதாக அவர் குற்றம்சாட்டியுள்ளார்.
ஊழலற்ற நிர்வாகம் என்ற வாக்குறுதிக்கு முதல்வர் பதில் சொல்வாரா?
ஊழலை ஒழிப்போம், நேர்மையான மற்றும் வெளிப்படையான நிர்வாகத்தை வழங்குவோம், அரசியலில் புதிய மாற்றத்தைக் கொண்டுவருவோம் எனத் தேர்தல் நேரத்தில் பல்வேறு வாக்குறுதிகளை வழங்கிய முதல்வர் ஜோசப் விஜய், தற்போது அமைச்சர்கள், சட்டமன்ற உறுப்பினர்கள் மற்றும் கட்சி நிர்வாகிகள் மீது தொடர்ந்து எழும் குற்றச்சாட்டுகளுக்குப் பதில் சொல்வாரா?
அல்லது மக்கள் எக்கேடு கெட்டாலும் தனக்கென்ன என்ற மனப்பான்மையுடன் எப்போதும் போல மௌனமாகக் கடந்து செல்வாரா? என்றும் டிடிவி தினகரன் கேள்வி எழுப்பியுள்ளார்.
சிவகங்கை எம்.எல்.ஏ. மீதான புகாரில் விரிவான விசாரணை நடத்த வேண்டும்!
தவெக ஆட்சி அமைந்தது முதல் போதைப்பொருள் கடத்தல், பயன்படுத்துதல், பெண்களுக்கு எதிரான பாலியல் குற்றங்கள், அரசு பதவிகளைப் பெறுவதற்காக ரூ.5 கோடி வரை லஞ்சப் பேரம் உள்ளிட்ட பல்வேறு புகார்கள் அமைச்சர்கள், சட்டமன்ற உறுப்பினர்கள் மற்றும் கட்சி நிர்வாகிகள் மீது எழுந்துள்ளதாக டிடிவி தினகரன் குறிப்பிட்டுள்ளார்.
இந்தப் புகார்களில் உரிய சட்ட நடவடிக்கை எடுக்காமல் அலட்சியமாகக் கடந்து சென்றதைப் போல, சிவகங்கை தவெக சட்டமன்ற உறுப்பினர் மீதான புகாரையும் அலட்சியப்படுத்திவிடக் கூடாது.
எனவே, இந்தப் புகார் குறித்து விரிவான விசாரணைக்கு உத்தரவிட வேண்டும். குற்றச்சாட்டுகள் உறுதி செய்யப்பட்டால் சம்பந்தப்பட்ட சட்டமன்ற உறுப்பினர் மீது எவ்விதத் தயக்கமுமின்றி கடுமையான சட்ட நடவடிக்கை எடுக்க வேண்டும் என முதலமைச்சர் ஜோசப் விஜய்யை வலியுறுத்திக் கேட்டுக்கொள்கிறேன் என்று டிடிவி தினகரன் தனது அறிக்கையில் தெரிவித்துள்ளார்.
செஞ்சி சிறுமி மாயம்: சரித்திர பதிவேடு குற்றவாளியின் நண்பரிடம் கிடுக்கிப்பிடி விசாரணை..!