தமிழகத்தில் கோடை வெயிலின் தாக்கம் நாளுக்கு நாள் அதிகரித்து வரும் நிலையில், பள்ளிகள் திறப்பை மேலும் ஒரு வாரத்திற்கு ஒத்திவைக்க வேண்டும் என்று இந்திய கம்யூனிஸ்ட் கட்சி (சிபிஐ) சார்பில் வீரபாண்டியன் தமிழக அரசுக்கு கோரிக்கை விடுத்துள்ளார். கடும் வெப்பநிலை காரணமாக மாணவர்கள் மற்றும் ஆசிரியர்களின் உடல்நிலை பாதிக்கப்படக்கூடும் என்பதால், அரசு அவசரமாக இந்த விவகாரத்தில் நடவடிக்கை எடுக்க வேண்டும் என அவர் வலியுறுத்தியுள்ளார்.
கோடை விடுமுறைக்கு பின்னர் பள்ளிகள் திறக்கப்பட உள்ள சூழலில், தற்போதைய வெயிலின் தீவிரம் குழந்தைகளின் ஆரோக்கியத்திற்கு ஆபத்தாக அமையலாம் என்று சிபிஐ கவலை தெரிவித்துள்ளது. குறிப்பாக சிறுவர்கள் நீண்ட நேரம் வெயிலில் பயணம் செய்து பள்ளிக்கு செல்ல வேண்டியிருப்பது சிரமத்தை ஏற்படுத்தும் என்றும் கூறப்பட்டுள்ளது. முன்னதாக, தனியார் பள்ளிகள் கூட்டமைப்பும் இதே கோரிக்கையை முன்வைத்து அரசுக்கு கடிதம் எழுதியிருந்தது. மேலும், சட்டமன்ற உறுப்பினர் தமிமுன் அன்சாரியும் பள்ளிகள் திறப்பை தள்ளிவைக்க வேண்டும் என்று வலியுறுத்தியிருந்தார். இந்நிலையில், பல்வேறு தரப்பிலிருந்தும் ஒரே மாதிரியான கோரிக்கைகள் எழுந்துவருவதால், தமிழக அரசு என்ன முடிவு எடுக்கப்போகிறது என்பது எதிர்பார்ப்பை ஏற்படுத்தியுள்ளது.
- Advertisement -