ஆன்லைன் உணவு டெலிவரி இனி கூடுதல் செலவு: பிளாட்பார்ம் கட்டணத்தை உயர்த்தியது சோமேட்டோ!

பிரபல உணவு டெலிவரி நிறுவனமான சோமேட்டோ தனது பிளாட்பார்ம் கட்டணத்தை 19% வரை உயர்த்தியுள்ளது.  இதனால் ஒரு ஆர்டருக்கான செலவு அதிகரிக்ககூடும் என வாடிக்கையாளர்கள் அதிர்ச்சி அடைந்துள்ளனர்.ஆன்லைனில் உணவு ஆர்டர் செய்யும் வாடிக்கையாளர்களுக்கு அதிர்ச்சியளிக்கும் வகையில், பிரபல உணவு டெலிவரி நிறுவனமான சோமேட்டோ (Zomato), தனது பிளாட்பார்ம் கட்டணத்தை 19% வரை உயர்த்தியுள்ளது. இன்று முதல் அமலுக்கு வந்துள்ள இந்த மாற்றத்தினால் ஒரு ஆர்டருக்கான கூடுதல் செலவு அதிகரித்துள்ளது.

கட்டண உயர்வு விவரம்
இதுவரை ஒரு ஆர்டருக்கு ரூ. 12.50 ஆக இருந்த பிளாட்பார்ம் கட்டணம், தற்போது ரூ. 14.90 ஆக உயர்த்தப்பட்டுள்ளது (GST வரி நீங்கலாக). வரிகளுடன் சேர்த்து கணக்கிடும்போது, வாடிக்கையாளர்கள் ஒவ்வொரு முறை உணவு ஆர்டர் செய்யும் போதும் தோராயமாக ரூ. 17 முதல் ரூ. 18 வரை பிளாட்பார்ம் கட்டணமாக மட்டுமே செலுத்த வேண்டியிருக்கும்.

ஏன் இந்த உயர்வு?
நிறுவனத்தின் லாப வரம்பை (Profit Margin) அதிகரிக்கவும், பெருகி வரும் செயல்பாட்டுச் செலவுகளைச் சமாளிக்கவும் இந்த நடவடிக்கை எடுக்கப்பட்டுள்ளதாகத் தெரிகிறது. குறிப்பாக:

எரிபொருள் விலை உயர்வு: கச்சா எண்ணெய் மற்றும் எல்பிஜி சிலிண்டர் விலை உயர்வால் டெலிவரி செலவுகள் அதிகரித்துள்ளது.

நிறுவன லாபம்: தனது தாய் நிறுவனமான ‘எடர்னல்’ (Eternal) லாபத்தை மேம்படுத்தும் நோக்கில் இந்த சிறிய கட்டண உயர்வுகள் அவ்வப்போது அமல்படுத்தப்படுகின்றன.

ஸ்விக்கி மற்றும் பிற நிறுவனங்களுடன் ஒப்பீடு
சோமேட்டோவின் முக்கியப் போட்டியாளரான ஸ்விக்கி (Swiggy) ஏற்கனவே தனது பிளாட்பார்ம் கட்டணத்தை வரிகளுடன் சேர்த்து ரூ. 14.99 என்ற அளவில் வசூலித்து வருகிறது. பொதுவாக ஒரு நிறுவனம் விலையை உயர்த்தினால் மற்றொன்றும் அதே பாதையைப் பின்பற்றுவது வழக்கம் என்பதால், ஸ்விக்கியும் வரும் நாட்களில் தனது கட்டணத்தை உயர்த்த வாய்ப்புள்ளதாகக் கருதப்படுகிறது.

மறுபுறம், பெங்களூரு போன்ற நகரங்களில் புதிதாக உணவு டெலிவரி சேவையைத் தொடங்கியுள்ள ராபிடோ (Rapido), தற்போது பிளாட்பார்ம் கட்டணம் எதுவும் வசூலிப்பதில்லை என்பது குறிப்பிடத்தக்கது.

வாடிக்கையாளர்கள் அதிருப்தி
“உணவின் விலை, பேக்கேஜிங் கட்டணம், டெலிவரி கட்டணம் மற்றும் ஜிஎஸ்டி ஆகியவற்றுடன் இந்த பிளாட்பார்ம் கட்டணமும் சேர்வது நடுத்தர வர்க்கத்தினருக்குப் பெரும் சுமையாக உள்ளது,” எனச் சமூக வலைதளங்களில் பயனர்கள் கருத்து தெரிவித்து வருகின்றனர்.

2023-ல் வெறும் ரூ. 2 ஆகத் தொடங்கப்பட்ட இந்தப் பிளாட்பார்ம் கட்டணம், கடந்த மூன்று ஆண்டுகளில் பலமுறை உயர்த்தப்பட்டு தற்போது ரூ. 15-ஐ நெருங்கியுள்ளது குறிப்பிடத்தக்கது.

தொழில்துறை டீசல் விலை லிட்டருக்கு ரூ.22 உயர்வு: பொதுத்துறை எண்ணெய் நிறுவனங்கள் அதிரடி