தருமபுரி மாவட்டத்தின் ‘மினி ஏற்காடு’ என்று அழைக்கப்படும் வத்தல்மலையில், இந்த ஆண்டு பலாப்பழம் அமோக விளைச்சல் கண்டுள்ள நிலையிலும், போதிய போக்குவரத்து வசதியும் வாங்குவதற்கு ஆட்களும் இல்லாததால் மரங்களிலேயே கனிந்து அழுகி வருவதாக மலைவாழ் விவசாயிகள் பெரும் வேதனை தெரிவித்துள்ளனர்.
தருமபுரி மாவட்டத்தில் கடல் மட்டத்திலிருந்து உயரத்தில் அமைந்துள்ள வத்தல்மலை, எப்போதும் குளுமையான காலநிலை நிலவும் ஒரு மலைப்பிரதேசமாகும். இங்கு ஏற்காடு, கொடைக்கானல் போன்றே சில்வர் ஓக் மரங்கள், காபி, ராகி, கடுகு போன்ற மலைப்பயிர்கள் அதிகளவில் சாகுபடி செய்யப்படுகின்றன. இதன் ஒரு பகுதியாக, விவசாயிகள் தங்கள் வயல் வரப்புகளில் பலா மரங்களையும் பெருமளவில் வளர்த்து வருகின்றனர்.
வேர் முதல் நுனி வரை கொத்துக் கொத்தாய் மகசூல்
கடந்த ஆண்டை விட இந்த ஆண்டு வத்தல்மலைப் பகுதியில் நல்ல மழை பெய்துள்ளது. இதன் காரணமாக பலா மரங்களில் விளைச்சல் பன்மடங்கு அதிகரித்துள்ளது. மரத்தின் அடிவேர் முதல் நுனிக்கிளைகள் வரை ஆங்காங்கே பலாப்பழங்கள் கொத்துக் கொத்தாகக் காய்த்துத் தொங்குகின்றன. அமோக விளைச்சலைக் கண்டு தொடக்கத்தில் மகிழ்ச்சியடைந்த விவசாயிகளுக்கு, தற்போதைய சூழல் பெரும் ஏமாற்றத்தையே தந்துள்ளது.
தேன் சொட்டும் பழங்கள்; சுவைக்க ஆள் இல்லை
வத்தல்மலைக்குச் சுற்றுலாப் பயணிகளின் வருகை மிகவும் குறைவாகவே உள்ளது. இதனால் உள்ளூரிலேயே பழங்களை விற்பனை செய்ய முடியாத நிலை நீடிக்கிறது. அதேநேரம், விளைந்துள்ள பலாப்பழங்களை அறுவடை செய்து தருமபுரி உள்ளிட்ட சமவெளிப் பகுதிச் சந்தைகளுக்குக் கொண்டு செல்ல முறையான பேருந்து அல்லது போக்குவரத்து வசதிகளும் இப்பகுதியில் இல்லை. தனியார் வாகனங்களை வாடகைக்கு எடுத்துச் செல்லலாம் என்றால், அதற்கு மிக அதிக அளவில் வாடகை கேட்கப்படுகிறது. சந்தையில் பலாப்பழம் விற்கும் விலையை விட, அதனைக் கொண்டு செல்லும் போக்குவரத்துச் செலவு அதிகமாக இருப்பதால், அறுவடை செய்வதையே விவசாயிகள் கைவிட்டுள்ளனர். இதனால் மரங்களிலேயே பழங்கள் நன்றாகக் கனிந்து, தேன் துளிகள் சொட்டச் சொட்ட, சுவைக்க ஆளில்லாமல் அழுகி கீழே கொட்டி வருகின்றன.
”மரங்கள் முழுக்கப் பழங்கள் கொத்துக் கொத்தாகத் தொங்குவதைப் பார்க்கப் பெருமையாக இருக்கிறது. ஆனால், ஒரு பழத்தைக் கூட விற்க முடியாமல் கண்கள் முன்பே அழுகிப் போவதைப் பார்க்கும்போது நெஞ்சம் வலிக்கிறது.” என வத்தல்மலை பகுதி விவசாயி வேதனையுடன் தெரிவித்துள்ளாா்.
சுற்றுலாத் தலமாக மேம்படுத்த கோரிக்கை
வத்தல்மலையை அரசு முழுமையான சுற்றுலாத் தலமாக அறிவித்து, உள்கட்டமைப்பு வசதிகளை மேம்படுத்தினால் மட்டுமே தங்களுக்கு விடிவுகாலம் பிறக்கும் என மலைவாழ் மக்கள் நம்புகின்றனர். சுற்றுலாப் பயணிகளின் வருகை அதிகரித்தால், இடைத்தரகர்கள் மற்றும் போக்குவரத்துச் செலவுகள் இன்றி தங்களின் விளைபொருட்களை நேரடியாகவே நல்ல விலைக்கு விற்க முடியும் என்றும், எனவே மாவட்ட நிர்வாகமும் சுற்றுலாத் துறையும் வத்தல்மலையை மேம்படுத்த உடனே நடவடிக்கை எடுக்க வேண்டும் என்றும் அப்பகுதி மக்கள் கோரிக்கை விடுத்துள்ளனர்.