சென்னை தலைமைச் செயலகத்தில் இன்று மார்க்சிஸ்ட் கம்யூனிஸ்ட் கட்சியின் (CPM) மாநிலச் செயலாளர் பெ. சண்முகம், தமிழக முதல்வர் விஜய்யை நேரில் சந்தித்துப் பேசினார். தேனி மாவட்டம் மேகமலை பகுதியில் வாழும் பூர்வகுடி மக்களின் வாழ்வாதாரம் மற்றும் பாதுகாப்பு குறித்து இந்த சந்திப்பில் முக்கியமாக விவாதிக்கப்பட்டது.
பின்னணி என்ன?
தேனி மாவட்டம் மேகமலை பகுதியில் ‘ஸ்ரீவில்லிபுத்தூர் மேகமலை புலிகள் சரணாலயம்’ அமைக்கப்படுவதாக அறிவிக்கப்பட்டதைத் தொடர்ந்து, அந்த சரணாலயத்தைச் சுற்றியுள்ள 98 கிராமங்களைச் சேர்ந்த மக்களை அப்புறப்படுத்த சென்னை உயர்நீதிமன்றம் உத்தரவிட்டது. இந்த நீதிமன்ற உத்தரவின் அடிப்படையில், தமிழக அரசு தற்போது அங்குள்ள மக்களை அப்புறப்படுத்துவதற்கான அடுத்தகட்ட நடவடிக்கைகளை மேற்கொண்டு வருகிறது.
பூர்வகுடி மக்களை அகற்றக் கூடாது: பெ. சண்முகம் கோரிக்கை
இந்தச் சூழ்நிலையில், மக்களின் வாழ்விட உரிமையைப் பாதுகாக்கும் பொருட்டு முதல்வர் விஜய்யை சந்தித்த பெ. சண்முகம், “மேகமலைப் பகுதியில் உள்ள மக்கள் பல தலைமுறைகளாக, பல ஆண்டுகளாக அங்கேயே பூர்வகுடிகளாக வாழ்ந்து வருகிறார்கள். எனவே, அங்குள்ள மக்களை எந்தக் காரணத்தைக் கொண்டும் அவர்தம் வாழ்விடங்களில் இருந்து அகற்றக்கூடாது” என வலியுறுத்திக் கேட்டுக்கொண்டார்.
அரசின் இந்த வெளியேற்ற நடவடிக்கையால் மக்களின் இயல்பு வாழ்க்கையும் வாழ்வாதாரமும் கடுமையாகப் பாதிக்கப்படும் என்பதால், இதில் முதல்வர் தலையிட்டு உரிய தீர்வு காண வேண்டும் என்றும் அவர் கோரிக்கை விடுத்தார்.
இந்த முக்கிய சந்திப்பின் போது, தமிழ்நாடு மலைவாழ் சங்கத்தின் தலைவர் டில்லி பாபுவும் உடனிருந்தார். மக்களின் இந்த நியாயமான கோரிக்கையை முதல்வர் கனிவுடன் கேட்டறிந்ததாகத் தெரிகிறது.