தேனி மாவட்டத்தில் ஆற்றில் துணி துவைக்கும் போது அழுக்குத் தண்ணீர் தெரித்ததில் ஏற்பட்ட பிரச்சினையில் மனநலம் பாதிக்கப்பட்ட நபரை தாக்கியதில் அவர் இறந்துள்ளார். சிறார் உட்பட ஏழு பேர் கைது செய்யப்பட்டுள்ளனர். இருவர் தலைமறைவாகி உள்ளனர்.
தேனி அருகே பழனிசெட்டிபட்டி மகாத்மா காந்தி தெருவை சேர்ந்த போஜராஜ் (80) என்பவரது மகன் தாமோதரன் (42). சற்று மனநலம் பாதிக்கப்பட்ட திருமணம் ஆகாத இவர் சாலைகளில் கிடக்கும் மதுபாட்டில்கள், அட்டைப் பெட்டிகளை சேகரித்து விற்பனை செய்து வந்தார். கடந்த நவம்பர் மாதம் 6 ஆம் தேதி வீட்டை விட்டு வெளியே வந்தவர் பழனிசெட்டிபட்டி காவல் நிலையம் பின்புறம் உள்ள அணைக்கருப்பணச்சாமி கோயில் அருகே செல்லும் முல்லைப் பெரியாறு ஆற்றுப் பகுதியில் உடலில் காயங்களுடன் மயங்கிய நிலையில் கிடப்பதாக, தாமோதரனின் தந்தை போஜராஜூக்கு தகவல் கிடைத்துள்ளது.
சம்பவ இடத்திற்கு சென்ற அவர், மகனை மீட்டு, தனியார் மருத்துவமனையில் அனுமதித்தார். அங்கு முதலுதவி செய்யப்பட்ட பின்னர் தேனி அரசு மருத்துவக்கல்லூரி மருத்துவமனையில் சேர்க்கப்பட்டுள்ளார். உடல்நிலை மிகவும் மோசமானதை தொடர்ந்து தந்தை போஜராஜ் மகன் தாமோதரனை வீட்டிற்கு அழைத்து வந்த மறுநாள் தாமோதரன் உயிரிழந்துள்ளார்.
தனது மகனின் இறப்பில் சந்தேகம் இருப்பதாக பழனிச்செட்டிபட்டி காவல் நிலையத்தில் புகார் அளித்ததன் அடிப்படையில் , சந்தேக மரணமாக காவல்துறையினர் வழக்குப்பதிந்த நிலையில், சில நாட்களில் தாமோதரனை தாக்கியதால் உயிரிழந்ததாக பிரேத பரிசோதனை அறிக்கையில் வந்திருக்கிறது. அதனைத் தொடர்ந்து எஸ்.பி. சிவபிரசாத் பழனிச்செட்டிபட்டி காவல் ஆய்வாளர் தலைமையில் தனிப்படை அமைக்கப்பட்டு குற்றவாளியை தேடி வந்தனர்.
இதில் சம்பந்தப்பட்ட நாளில் அணைக்கருப்பணசாமி கோயில் பகுதியில் உள்ள ஒரு கண்காணிப்பு கேமராவில் 9 வாலிபர்கள் செல்வது பதிவாகிய இருந்தது. அதனடிப்படையில் விசாரணையை தீவிரப்படுத்திய காவல் துறையினர், அப்பகுதியில் உள்ள சிசிடிவி கேமராவில் சில இளைஞர்கள் நடமாட்டம் இருந்ததுபதிவாகி இருந்தது.
விசாரணையை தீவிரப்படுத்திய நிலையில் கேமராவில் பதிவாகி இருந்தது அல்லிநகரம் பகுதியில் உள்ள கக்கன்ஜி காலனியை சேர்ந்த பிரவீன்குமார் (23), ஹரீஸ்பிரவீன் (19), விஜயபாரதி(19), அன்புச்செல்வம் (22), புவனேஸ்வரன் (18), அருண்குமார், மாயக்கண்ணன், 17 மற்றும் 16 வயது சிறுவர்கள், ஆகிய 9 பேர் என தெரியவந்துள்ளது.
அதனைத்தொடர்ந்து அருண்குமார், மாயக்கண்ணன் ஆகியோரை தவிர மற்ற 6 நபர்களை காவல் நிலையம் அழைத்து வந்து விசாரணை செய்ததில், நவம்பர் 6 ஆம் தேதி ஆற்றுப்பகுதியில் தாமோதரன் அவரது துணியை துவைத்துக் கொண்டு இருந்த போது அருகே இருந்த அந்த இளைஞர்கள் மீது அழுக்குத் தண்ணீர் தெரித்ததாகவும், இதனால் இருதரப்பினருக்கும் இடையே வாக்குவாதம் ஏற்பட்டு மோதலாக மாறி உள்ளது.
இதில் அருகில் கிடந்த தென்னை மட்டை, கம்புகளால் தாமோதரனை அந்த 9 நபர்களும் தாக்கியுள்ளனர். தாமோதரன் மயக்கம் அடைந்த நிலையில் அவர்கள் அனைவரும் அங்கிருந்து சென்றுள்ளனர். இதனைத்தொடர்ந்து சிறார் உட்பட ஏழு நபர்களையும் காவல் துறையினர் நீதிமன்றத்தில் ஆஜர் படுத்தி சிறையில் அடைத்தனர். மேலும் தலைமறைவாக உள்ள அருண்குமார் மற்றும் மாயக்கண்ணன் ஆகியோரை போலீசார் தேடி வருகின்றனர்.
துணி துவைக்கும் போது அழுக்குத் தண்ணீர் தெரித்ததில் ஏற்பட்ட தகராறில் கூலி தொழிலாளி இறந்த சம்பவத்தில் ஒரு மாதத்திற்கு பிறகு குற்றவாளிகள் கைது செய்யப்பட்ட சம்பவம் பெரும் பரபரப்பை ஏற்படுத்தியுள்ளது. அதனைத்தொடர்ந்து ஏழு நபர்களை கைது செய்து தீவிர விசாரணை மேற்கொண்டதில் தாமோதரனை தாக்கியது அந்த 9 நபர்கள் என தெரியவந்துள்ளது.