தமிழக முதல்வர் சி. ஜோசப் விஜய்யை ஒருமையில் விமர்சித்துப் பேசியதாகவும், கொலை மிரட்டல் விடுத்ததாகவும் எழுந்த புகாரின் பேரில் விளாத்திகுளம் தொகுதி திமுக எம்.எல்.ஏ. ஜி.வி. மார்க்கண்டேயன் காவல்துறையினரால் கைது செய்யப்பட்ட சம்பவத்தைத் தொடர்ந்து, அவர் தகுதி நீக்கம் செய்யப்படுவாரா என்ற விவாதம் தீவிரமடைந்துள்ளது.
வழக்கும் அதிரடிக் கைதும்!
கோவில்பட்டியில் நடைபெற்ற பொதுக்கூட்டம் ஒன்றில் உரையாற்றிய விளாத்திகுளம் திமுக சட்டமன்ற உறுப்பினர் மார்க்கண்டேயன், தமிழக முதல்வர் விஜய் குறித்து சர்ச்சைக்குரிய வகையில் பேசியதாகத் தமிழக வெற்றிக் கழகம் (தவெக) சார்பில் தூத்துக்குடி மாவட்ட குற்றப்பிரிவு காவல்துறையில் புகார் அளிக்கப்பட்டது. இதன் பேரில், கலவரத்தைத் தூண்டுதல் மற்றும் கொலை மிரட்டல் உள்ளிட்ட பாரதிய நியாய சன்ஹிதா (BNS) பிரிவுகளின் கீழ் வழக்குப்பதிவு செய்த காவல்துறையினர், விளாத்திகுளத்தில் உள்ள அவரது இல்லத்தில் வைத்து மார்க்கண்டேயனைக் கைது செய்து நீதிமன்றக் காவலில் அடைத்தனர்.
சபாநாயகரின் அனுமதி பெற்றிருக்க வேண்டுமா? – சபாநாயகர் ஜே.சி.டி. பிரபாகர் விளக்கம்
ஒரு சட்டமன்ற உறுப்பினரைக் கைது செய்வதற்கு முன்பாகச் சட்டப்பேரவை சபாநாயகரின் அனுமதி பெறப்பட வேண்டுமா? என்ற கேள்வியும், அவரைத் தகுதி நீக்கம் செய்ய வாய்ப்புள்ளதா என்ற சர்ச்சையும் எழுந்த நிலையில், தமிழகச் சட்டப்பேரவை சபாநாயகர் ஜே.சி.டி. பிரபாகர் செய்தியாளர்களைச் சந்தித்துப் தெளிவுபடுத்தினார்.
சபாநாயகர் தெரிவித்ததாவது, ”சட்டமன்ற உறுப்பினர் மார்க்கண்டேயன் கைது செய்யப்பட்டுள்ள தகவல் எங்களுக்குக் கிடைத்துள்ளது. இது குறித்த விவரங்கள் சட்டப்பேரவை உறுப்பினர்களுக்கு முறைப்படி அறிவிக்கப்படும். பேரவைச் சட்ட விதி 291-ன் படி, ‘சட்டப்பேரவையின் அமைப்பு எல்லைக்குள்’ (Assembly Precincts) சபாநாயகரின் முன்அனுமதி இல்லாமல் எந்த ஒரு உறுப்பினரையும் கைது செய்யக் கூடாது. ஆனால், பேரவை வளாகத்திற்கு வெளியே நடைபெறும் நிகழ்வுகள் அல்லது குற்றவியல் வழக்குகளில் சபாநாயகரின் நேரடி தலையீடோ அல்லது முன்அனுமதியோ தேவையில்லை.” சட்டமன்ற வளாகம், அலுவலகங்கள், அமைச்சர்களின் அறைகள் மற்றும் அரசினர் குடியிருப்பு ஆகியவை மட்டுமே பேரவை எல்லைக்குட்பட்ட பகுதி என்றும், அதற்கு வெளியே நடைபெறும் நடவடிக்கைகளில் காவல்துறை சட்டப்படி செயல்பட விதிகளில் இடமுள்ளது என்றும் அவர் விளக்கமளித்தார்.
தகுதி நீக்கம் செய்யப்படுவாரா? – தீவிரமடையும் அரசியல் களம்
ஒரு மக்கள் பிரதிநிதி கைது செய்யப்பட்டு நீதிமன்றக் காவலில் வைக்கப்படும் பட்சத்தில், மக்கள் பிரதிநிதித்துவச் சட்டத்தின் கீழ் அடுத்தகட்ட சட்ட நடவடிக்கையாகத் தகுதி நீக்கம் செய்ய வாய்ப்புள்ளதா என்பது குறித்துச் சட்ட வல்லுநர்களுடன் ஆலோசனை நடத்தப்பட்டு வருகிறது. திமுக எம்பிக்களும் நிர்வாகிகளும் இக்கைது நடவடிக்கையைக் கண்டித்துக் குரல் கொடுத்து வரும் நிலையில், சட்ட ஒழுங்கைச் சீர்குலைக்கும் வகையில் பேசும் எவர் மீது சட்டப்பூர்வ நடவடிக்கை பாயும் எனத் தவெக தரப்பில் தெரிவிக்கப்பட்டுள்ளது. இச்சம்பவம் தமிழக அரசியலில் பெரும் அதிர்வலைகளை ஏற்படுத்தியுள்ளது.