தமிழகம் முழுவதும் அரசுப் பள்ளிகளில் மாணவர் சேர்க்கை ஆண்டுக்காண்டு குறைந்து வரும் நிலையில், தேனி மாவட்டம் ஆண்டிபட்டி ஊராட்சி ஒன்றியத்தில் ஒரு மாணவர் கூட வராததால் 2 அரசுத் தொடக்கப் பள்ளிகள் முற்றிலும் மூடப்படும் அவல நிலைக்குத் தள்ளப்பட்டுள்ளன. கடந்த ஆண்டு வரை இயங்கி வந்த இப்பள்ளிகளுக்கு, நடப்பு கல்வியாண்டில் ஆசிரியர்கள் மட்டுமே வந்து கையெழுத்திட்டுச் செல்லும் சூழல் நிலவுகிறது.
மாணவர்கள் இல்லாத வகுப்பறைகள்
தேனி மாவட்டம் ஆண்டிபட்டி ஊராட்சி ஒன்றியத்திற்கு உட்பட்ட நீரார்பட்டி மற்றும் பழனிதேவன்பட்டி ஆகிய கிராமங்களில் 20 ஆண்டுகளுக்கும் மேலாகப் பழமையான ஊராட்சி ஒன்றிய தொடக்கப் பள்ளிகள் செயல்பட்டு வருகின்றன. கடந்த ஆண்டு வரை இப்பள்ளிகளில் மிகக் குறைந்த எண்ணிக்கையிலான மாணவர்களுடன் வகுப்புகள் நடைபெற்று வந்தன. குறிப்பாக, நீரார்பட்டி அரசுப் பள்ளியில் கடந்த ஆண்டு 5 மாணவர்களும், பழனிதேவன்பட்டி பள்ளியில் 3 மாணவர்களும் படித்து வந்தனர். இவர்களுக்குப் பாடம் நடத்த தலா ஒரு ஆசிரியரும் நியமிக்கப்பட்டிருந்தனர். ஆனால், நடப்பு கல்வியாண்டு தொடங்கி ஒரு மாதத்திற்கு மேலாகியும், இந்த இரண்டு பள்ளிகளுக்கும் ஒரு மாணவர் கூட சேர்க்கை பெறவில்லை; வருகையும் தரவில்லை.
ஆசிரியர்கள் மட்டுமே வரும் அவலம்
பள்ளியில் மாணவர்கள் யாரும் இல்லாத நிலையிலும், அரசு விதிமுறைப்படி தினசரி ஆசிரியர்கள் மட்டும் பள்ளிக்கு வந்து, வருகைப் பதிவேட்டில் கையொப்பமிட்டுவிட்டு நாள் முழுவதும் காத்திருந்து பின்னர் வீடு திரும்பும் அவல நிலை நீடித்து வருகிறது. இதனால் நடப்பாண்டில் ஆண்டிபட்டி ஒன்றியத்தில் மட்டும் இந்த இரண்டு அரசுப் பள்ளிகளும் முழுமையாக மூடப்படும் நிலைக்குச் சென்றுள்ளன. இதுகுறித்து உள்ளூர் கிராம மக்களிடம் கேட்டபோது, “கிராமங்களில் உள்ள சிறுவர்களைப் பெற்றோர்கள் தங்களின் விருப்பத்தின் பேரில் அருகில் உள்ள தனியார் பள்ளிகளுக்கு அனுப்பி விடுகின்றனர். அதனால் உள்ளூர் அரசுப் பள்ளிகளில் மாணவர்கள் யாரும் சேரவில்லை. இருப்பினும், ஏழை எளிய மக்களின் நலன் கருதி எங்கள் கிராமத்து அரசுப் பள்ளிகள் தொடர்ந்து செயல்பட வேண்டும் என்பதே எங்களின் விருப்பம். இதற்குத் தமிழக அரசு உரிய நடவடிக்கை எடுக்க வேண்டும்,” என்று கோரிக்கை விடுத்துள்ளனர்.
உயரதிகாரிகளின் உத்தரவுக்குக் காத்திருப்பு
இந்த விவகாரம் தொடர்பாக ஆண்டிபட்டி உதவி தொடக்கக் கல்வி அலுவலரிடம் கேட்டபோது, “மாணவர்கள் யாரும் வராத காரணத்தால் தற்போது இந்த இரண்டு பள்ளிகளும் செயல்படாமல் முடங்கியுள்ளன. இதுகுறித்த விபரங்கள் மாவட்டக் கல்வித் துறைக்குத் தெரிவிக்கப்பட்டுள்ளது. உயர் அதிகாரிகளிடமிருந்து இறுதி உத்தரவு வந்தவுடன், இந்த இரண்டு பள்ளிகளிலும் பணியாற்றும் ஆசிரியர்கள் அருகில் உள்ள பிற அரசுப் பள்ளிகளுக்கு இடமாற்றம் செய்யப்படுவார்கள்,” என்று அவர் தெரிவித்தார். தமிழகம் முழுவதும் பெரும்பாலான அரசுப் பள்ளிகள் ஒன்று அல்லது இரண்டு மாணவர்களுடன் தட்டுத்தடுமாறி இயங்கி வரும் சூழலில், ஆண்டிபட்டியின் இந்த இரண்டு பள்ளிகள் முற்றிலும் மாணவர்களே இல்லாமல் மூடப்படும் நிலைக்குத் தள்ளப்பட்டிருப்பது சமூக ஆர்வலர்கள் மற்றும் கல்வியாளர்கள் மத்தியில் பெரும் கவலையை ஏற்படுத்தியுள்ளது.
தமிழகத்தில் வரலாறு காணாத பால் தட்டுப்பாடு அபாயம்: தனியார் பால், தயிர் விலை லிட்டருக்கு ரூ.4 உயர்வு!