கரூரில் 41 பேர் உயிரிழந்த கொடூரச் சம்பவத்தைச் சர்ச்சைக்குரிய மற்றும் இழிவுபடுத்தும் வகையில் நகைச்சுவையாகப் பேசியதாக, பிரபல யூடியூபர் பயாஸ் உசைன் மீது சென்னை காவல் ஆணையர் அலுவலகத்தில் வழக்கறிஞர்கள் தரப்பில் அதிரடி புகார் அளிக்கப்பட்டுள்ளது. இந்த விவகாரம் தற்போது சமூக வலைதளங்களில் பெரும் கொந்தளிப்பையும் பரபரப்பையும் ஏற்படுத்தியுள்ளது.
‘ஸ்டாண்ட்-அப் காமெடி’ என்ற பெயரில் இழிவு
’PUN DANK’ என்ற யூடியூப் சேனல் மூலம் ஸ்டாண்ட்-அப் காமெடி (Stand-up Comedy) நிகழ்ச்சிகளை நடத்தி வருபவர் பயாஸ் உசைன். இவர் சமீபத்தில் நடத்திய நிகழ்ச்சி ஒன்றில், கரூரில் நடந்த 41 பேரின் மரணத்தைத் துச்சமாக மதித்து நகைச்சுவை வடிவில் சித்தரித்ததாகக் குற்றச்சாட்டு எழுந்துள்ளது. குறிப்பாக, தனது பேச்சின் போது, “41 பேரைக் கொன்றவர்கள் வெளியில் சுதந்திரமாகச் சுற்றுகிறார்கள்; ஆனால் என் மீது மட்டும் வழக்கு போடுகிறார்கள்” என அவர் பேசியதாகப் புகாரில் சுட்டிக்காட்டப்பட்டுள்ளது.
பொதுமக்களின் உணர்வுகளைப் புண்படுத்தும் செயல்
கரூர் கூட்ட நெரிசல் விபத்து தொடர்பாக ஏற்கனவே உச்ச நீதிமன்ற உத்தரவின் பேரில், ஓய்வுபெற்ற நீதிபதி தலைமையிலான கண்காணிப்பில் சிபிஐ (CBI) விசாரணை தீவிரமாக நடைபெற்று வருகிறது. இத்தகைய தீவிரமான சூழலில், இத்தனை உயிர்கள் பலியான ஒரு துயரச் சம்பவத்தை மேடைகளில் நகைச்சுவை என்ற பெயரில் கொச்சைப்படுத்துவது பொதுமக்களின் உணர்வுகளைக் கடுமையாகப் புண்படுத்துவதாக வழக்கறிஞர்கள் தெரிவித்துள்ளனர். 
இதுகுறித்து காவல் ஆணையர் அலுவலகத்தில் புகார் அளித்த பின் செய்தியாளர்களிடம் பேசிய வழக்கறிஞர் ஆதித்யன் கூறியதாவது, ”உயிரிழந்த 41 பேரின் குடும்பத்துத் துயரத்தை இழிவுபடுத்தும் வகையில் இத்தகைய கருத்துகள் வெளிவருவது எந்த விதத்திலும் ஏற்றுக்கொள்ள முடியாதது. இது சமூகத்தில் தேவையற்ற பதற்றத்தையும், சர்ச்சையையும் திட்டமிட்டு உருவாக்குகிறது. சமூக வலைதளங்களில் லட்சக்கணக்கான பார்வையாளர்களைக் கொண்டுள்ள நபர்கள் பொறுப்புடன் பேசக் கற்றுக்கொள்ள வேண்டும். சட்டத்திற்கு முரணான கருத்துகளைப் பரப்புவோர் மீது உடனடி நடவடிக்கை எடுக்கப்பட வேண்டும்.” மேலும், உயிர்களை மதிக்காமல் பொது அமைதியைக் கெடுக்கும் வகையில் பேசிய யூடியூபர் பயாஸ் உசைன் மீது உரிய பிரிவுகளின் கீழ் சட்டப்பூர்வ நடவடிக்கை எடுக்க வேண்டும் என காவல்துறையிடம் கோரிக்கை வைக்கப்பட்டுள்ளது. இந்த விவகாரம் இணையத்திலும், அரசியல் மற்றும் சமூக வட்டாரங்களிலும் தற்போது விவாதப் பொருளாக மாறியுள்ளது.
புதுச்சேரி அரசு பள்ளி மாணவர்களுக்கு பாலுடன் ‘சாக்லேட் மால்ட்’ ஹெல்த் மிக்ஸ் வழங்கும் திட்டம்!