கோவையில் இளைஞர் படுகொலை: தற்கொலை நாடகம் அம்பலம்! உறவினர்கள் திடீர் சாலை மறியலால் பரபரப்பு!

​கோவையில் புகைப்படக் கலைஞர் திட்டமிட்டுக் கொலை செய்யப்பட்டு, ரயில்வே தண்டவாளத்தில் வீசப்பட்ட சம்பவம் பெரும் அதிர்ச்சியை ஏற்படுத்தியுள்ளது. கொலையாளிகள் நீதிமன்றத்தில் சரணடைந்த நிலையில், இந்த வழக்கில் போலீசார் மெத்தனம் காட்டுவதாகக் கூறி பிரவீனின் உறவினர்கள் கோவையில் திடீர் சாலை மறியல் போராட்டத்தில் ஈடுபட்டனர்.
​

காணாமல் போன புகைப்படக் கலைஞர்:
​கோவை தடாகம் அடுத்த மடத்தூர் பகுதியைச் சேர்ந்தவர் பிரவீன் (24). புகைப்படக் கலைஞரான (Photographer) இவர், கடந்த வாரம் வியாழக்கிழமை தனக்குப் புதிய போட்டோகிராபி ஆர்டர் ஒன்று வந்து இருப்பதாகக் கூறிவிட்டு ஒட்டன்சத்திரத்திற்குப் புறப்பட்டுச் சென்றுள்ளார்.
​ஆனால், அதன்பின் அவர் வீடு திரும்பவில்லை. இதனால் பதற்றமடைந்த குடும்பத்தினர் தடாகம் காவல் நிலையத்தில் புகார் அளித்தனர். ஆனால், புகாரின் பேரில் போலீசார் உடனடியாக வழக்குப் பதிவு செய்யாமல் மெத்தனம் காட்டியதாகக் கூறப்படுகிறது.
​

தண்டவாளத்தில் சடலம் – தற்கொலை நாடகம்:
​இதற்கிடையில், கோவை கிணத்துக்கடவு அருகே உள்ள ஏ.பி.சி (ABC) தியேட்டர் பின்புறமுள்ள ரயில்வே தண்டவாளத்தில் வாலிபர் ஒருவர் ரயிலில் அடிபட்டு, உடல் துண்டான நிலையில் சடலமாகக் கண்டெடுக்கப்பட்டார். போத்தனூர் ரயில்வே போலீஸார் உடலைக் கைப்பற்றிச் சந்தேக மரண வழக்காகப் பதிவு செய்து விசாரணை நடத்தியதில், அது காணாமல் போன பிரவீன் என்பது உறுதி செய்யப்பட்டது. இதனால் பிரவீன் ரயிலில் பாய்ந்து தற்கொலை செய்து கொண்டதாகவே அனைவரும் கருதினர்.
​

நீதிமன்றத்தில் சரணடைந்த கொலையாளிகள்: திகைப்பூட்டும் பின்னணி!
​இந்நிலையில், இவ்வழக்கில் யாரும் எதிர்பாராத அதிரடித் திருப்பமாக, கோவை ஜே.எம்.1 (JM 1) நீதிமன்றத்தில் கரூரைச் சேர்ந்த மனோஜ் மற்றும் அவரது நண்பர் கார்த்திகேயன் ஆகியோர் ஆஜராகி, பிரவீனைத் தாங்கள் தான் திட்டமிட்டுக் கொலை செய்து தண்டவாளத்தில் வீசியதாக ஒப்புக்கொண்டு சரணடைந்தனர்.
​

கொலைக்கான காரணம் குறித்து அவர்கள் அளித்த வாக்குமூலம்:
​பிரவீனை கொலை செய்த மனோஜும், கோவை சாய்பாபா காலனியைச் சேர்ந்த ஒரு பெண்ணும் கடந்த 4 வருடங்களாக இன்ஸ்டாகிராம் (Instagram) மூலமாகக் காதலித்து வந்துள்ளனர்.
​

இதற்கிடையே, அந்தப் பெண் பிரவீனுடன் நெருக்கமாகப் பழகியுள்ளார். இதனால் ஆத்திரமடைந்த மனோஜ், ‘போட்டோ சூட்’ என்ற பெயரில் பிரவீனை ஒட்டன்சத்திரம் வரவழைத்துள்ளார். அங்கு வைத்து அவருக்கு மது வாங்கிக் கொடுத்து, காரிலேயே படுகொலை செய்துள்ளனர். பின்னர், கொலையை மறைக்க பிரவீனின் உடலை கிணத்துக்கடவு ரயில் தண்டவாளத்தில் வீசிவிட்டு, அவர் ரயிலில் பாய்ந்து தற்கொலை செய்து கொண்டது போல நாடகமாடியுள்ளனர். இதையடுத்து, சரணடைந்த இருவரையும் நீதிமன்றக் காவலில் சிறையில் அடைக்க நீதிபதி உத்தரவிட்டார்.
​

உறவினர்கள் சாலை மறியல் – முக்கோணக் காதல் இல்லையென மறுப்பு:
​கொலை செய்யப்பட்ட பிரவீனின் உடலை வாங்க மறுத்த அவரது உறவினர்கள் மற்றும் பொதுமக்கள், சிங்காநல்லூர் – ஹோப் காலேஜ் பிரதான சாலையில் திரண்டு திடீர் சாலை மறியலில் ஈடுபட்டனர்.
​

போராட்டத்தில் ஈடுபட்டவர்கள் கூறியதாவது:
“பிரவீன் மாயமானது தொடர்பாகப் புகார் அளித்தும் போலீசார் எந்தவித நடவடிக்கையும் எடுக்கவில்லை. நாங்கள்தான் தேடி அலைந்து சிசிடிவி (CCTV) ஆதாரங்களைத் திரட்டினோம். அதன் பிறகுதான் போலீசாரின் அலட்சியத்தால் குற்றவாளிகள் நீதிமன்றத்தில் தப்பித்துச் சரணடைந்துள்ளனர்.
​

இச்சம்பவத்தில் கூறப்படுவது போல இது முக்கோணக் காதல் இல்லை. குறிப்பிட்ட அந்தப் பெண்ணும் பிரவீனும் தான் காதலித்து வந்தனர். இது பிடிக்காமல் தான் இந்தத் துரோகக் கொலை நடந்துள்ளது. இக்கொலை வழக்கில் அந்தப் பெண் உட்பட மேலும் சிலருக்குத் தொடர்பு உள்ளது. அவர்களைக் கைது செய்யாமல் போலீசார் அலட்சியம் காட்டுகின்றனர்” என்று குற்றம்சாட்டினர்.
​

போக்குவரத்து நெரிசல் மற்றும் போலீஸ் பேச்சுவார்த்தை:
​பொதுமக்களின் இந்தத் திடீர் போராட்டத்தால் காமராஜர் சாலையில் கடுமையான போக்குவரத்து நெரிசல் ஏற்பட்டது. சம்பவ இடத்திற்கு விரைந்து வந்த போலிஸார், மறியலில் ஈடுபட்டவர்களுடன் நீண்ட நேரம் சமரசப் பேச்சுவார்த்தை நடத்தினர். உரிய நடவடிக்கை எடுக்கப்படும் என உறுதி அளிக்கப்பட்டதைத் தொடர்ந்து, பொதுமக்கள் போராட்டத்தைக் கைவிட்டுப் பிரவீனின் உடலைப் பெற்றுச் சென்றனர். இச்சம்பவம் கோவையில் பெரும் பரபரப்பை ஏற்படுத்தியுள்ளது.