தமிழக சட்டப்பேரவை தேர்தலில் ஏராளமான புதுமண தம்பதிகள் மணக்கோலத்தில் வந்து தங்கள் வாக்குகளை பதிவு செய்தனர்.
தமிழகத்தில் நடைபெற்று வரும் சட்டப்பேரவைத் தேர்தலில், ஜனநாயகத்தின் மீது மக்களின் ஈடுபாடு பல்வேறு விதங்களில் வெளிப்படுகிறது. அதில் குறிப்பிடத்தக்கதாக, புதுமண தம்பதிகள் மணக்கோலத்திலேயே வாக்குச்சாவடிகளுக்கு வந்து தங்கள் வாக்குகளை பதிவு செய்த சம்பவங்கள் கவனம் ஈர்த்துள்ளன.
இன்று (ஏப்ரல் 23) மாநிலம் முழுவதும் 234 சட்டமன்றத் தொகுதிகளுக்கான வாக்குப்பதிவு நடைபெற்று வருகிறது. இந்த தேர்தலில் திமுக கூட்டணி, அதிமுக கூட்டணி, நாதக மற்றும் தவெக உள்ளிட்ட கட்சிகள் போட்டியிடுகின்றன. மொத்தம் 4,023 வேட்பாளர்கள் களத்தில் உள்ள நிலையில், சுமார் 5.73 கோடி வாக்காளர்கள் தங்கள் வாக்குரிமையை பயன்படுத்த தகுதி பெற்றுள்ளனர்.
காலை முதலே வாக்குச்சாவடிகளில் மக்கள் ஆர்வத்துடன் திரண்டு வாக்களித்து வருகின்றனர். இந்த நிலையில், கிருஷ்ணகிரி மாவட்டம் காவேரிபட்டினத்தில் புதுமண தம்பதிகள் திலிப்குமார் – சினேகப்ரியா மணமக்கள் உடையணிந்தபடியே வந்து வாக்களித்தனர். அதேபோல், நெல்லை மாவட்டம் பாளையங்கோட்டையை சேர்ந்த வெங்கடகிருஷ்ணன் – அபிராமி தம்பதியும் திருமண அலங்காரத்திலேயே வாக்குச்சாவடிக்கு வந்து ஜனநாயக கடமையை நிறைவேற்றினர்.
இந்த நிகழ்வுகள், இளைஞர்கள் மத்தியில் தேர்தல் விழிப்புணர்வு அதிகரித்துள்ளதையும், திருமண நாள் போன்ற முக்கிய தருணங்களிலும் கூட வாக்குரிமைக்கு முன்னுரிமை அளிக்கப்படுவதை வெளிப்படுத்துகின்றன. ஜனநாயகத்தின் வலிமை மக்கள் பங்கேற்பில் இருக்கிறது என்பதை இத்தகைய சம்பவங்கள் மீண்டும் ஒருமுறை உணர்த்துகின்றன.
தேர்தல் 2026 – விதிகளை மீறி இன்ஸ்டாவில் வீடியோ வெளியிட்ட தவெக பிரமுகர் கைது