நீட் வினாத்தாள் கசிவு விவகாரத்தில் விரைவு நீதிமன்றங்கள் அமைக்கப்படும் என்ற பிரதமரின் அறிவிப்பு, மாணவர்களின் கோரிக்கைகளை திசைதிருப்பும் ஒரு “ஏமாற்று வேலை” என மதுரை நாடாளுமன்ற உறுப்பினர் சு.வெங்கடேசன் மிகக் கடுமையாகச் சாடியுள்ளார்.
இது குறித்து அவர் வெளியிட்டுள்ள அறிக்கையில் கூறியிருப்பதாவது,
உறங்கிக் கொண்டிருந்த பிரதமரை விழித்தெழச் செய்த மாணவர்கள்
நாடெங்கும் வீதியில் இறங்கிப் போராடி வரும் மாணவர்களின் எழுச்சிமிக்கப் போராட்டம், இத்தனை நாட்களாக உறங்கிக் கொண்டிருந்த பிரதமரைத் தட்டி எழுப்பியிருப்பது பாராட்டத்தக்கது. ஆனால், பிரதமர் நரேந்திர மோடியின் தற்போதைய பதிவில், போராடும் மாணவர்களின் நியாயமான கோரிக்கைகள் குறித்து எந்தவொரு அறிவிப்பும் இடம்பெறவில்லை. உங்கள் மீதும், நாட்டின் கல்வி அமைப்பை முற்றிலுமாகச் சிதைத்த மத்திய கல்வி அமைச்சர் தர்மேந்திர பிரதான் மீதும் நம்பிக்கை இழந்த காரணத்தால்தான் மாணவர்கள் இன்று வீதிக்கு வந்து போராடும் நிலைக்குத் தள்ளப்பட்டார்கள்.
அமைச்சரை வைத்துக்கொண்டே நீதி பேசுவது ஏமாற்று வேலை
தேர்வு முறைகேடுகளுக்குப் பொறுப்பேற்க வேண்டிய தர்மேந்திர பிரதானை மீண்டும் அதே அமைச்சுப் பதவியில் அமரவைத்துக்கொண்டே, “தவறிழைத்த யாரையும் நாங்கள் விட்டுவைக்க மாட்டோம்” என்று பிரதமர் கூறுவது அப்பட்டமான நாடகத்தனமான ஏமாற்று வேலையாகும். அதேபோல, டெல்லியில் அறவழியில் அமைதியாகப் போராடிய மாணவர்கள் மீது துளியும் மனிதத்தன்மையின்றி காட்டுமிராண்டித்தனமான தாக்குதலைக் கட்டவிழ்த்துவிட்ட மத்திய உள்துறை அமைச்சர் அமித் ஷா மீது பிரதமர் என்ன நடவடிக்கை எடுக்கப் போகிறார்?
கோரிக்கைகளை நிறைவேற்ற வலியுறுத்தல்
மாணவர்களின் நியாயமான கோரிக்கைகளை முழுமையாக நிறைவேற்றாத வரையில், பிரதமரின் இதுபோன்ற வேறு எந்தச் சமாளிப்பு நடவடிக்கைகளும் மாணவர்கள் மத்தியில் துளிக்கூட நம்பிக்கையை ஏற்படுத்தாது என்பதைப் பிரதமர் நரேந்திர மோடி உணர்ந்து கொள்ள வேண்டும். இவ்வாறு சு.வெங்கடேசன் எம்.பி. தெரிவித்துள்ளார்.